Лъэу ягъэччагъэм хэпц1ахьыжыгъэу
Адыгэ хьадэр зэтелъэу шылъ
Зэдэщхэтыгъэх зы 1анэ пэсэу
Зэрэук1ыгъэхэу ялъы зэхэлъ.
Зэфэдэныгъэм к1эбэныхэзэ
Зэфэдэ къабзэу зэхэк1одагъ
Пщэри пщыл1эри унэ1утэри
Пщыл1ы курыбзэу къызэхэнагъ.
Тэ тызэфэдэу адыгэ дэдэу
Тызшыпсэугъэ лъэхъан шы1агъ
Зы тхьамэтэжъым л1акъор едэ1оу
Адыгэ шъыпкъэу тэ тыщы1агъ.
Тишъу1эщхъуныгъэу ти адыгагъэ
Ц1ыфыгъэр лъэщэу тэ тилъэп1агъ
Мы адыгэми ц1ыфыгъэ хэлъым
Адыгэ фэдэу ц1ыф рядгъэ1уагъ.
Хамэ къытхащи тызэригъащ1и
Зытымыщ1эжэу тыкъагъэнагъ
Тишъу1эщхъуныгъэ тшъу1агъэк1оди
Я1орэ тишъу1эщхъоу тыкъагъэнагъ.
Урыси тыркуи инджылызыми
Хэти тедэ1угъ тызэмдэ1ужэу
Тызэшу1эк1одыгъ ахэм тядэ1уи
Зэгъунэгъуит1о зэгурымы1ожэу.
Адыгэм и1агъэп пщыл1эри пщэри
Ц1ыфыгъэх зэк1э зэфэдэ къабзэу
Яшъу1эщхъуныгъэ тишъу1эщ1ы ящ1и
Тахэк1ок1агъ ащ яфэдэ къабзэу.
Ишъу1эщхъуныгъэ зимы1э л1акъо
Пхъэ шъугъэм фэдэш ш1эх зэхэтакъо
Уишъу1эщ мыхъужым о адыгагъэ
Дэуштэу адыгэ ухъута къа1о.
Хъурэ зэпстэуи яшъу1эщ зэрэхъоу
Щыхъунэу къэхъущ ари ягъащ1э
Зэрэхъутэри зишъу1эщы мыхъоу
Къэхъурэ зэк1э мыхъо-мыщ1э.
Я1орэ зэк1э уишъу1эщ1ы пщ1ымы
Пщыхэр уитепщэу узепшыпшэн
Уитепщэ хъугъэр унэ1утымы
Узиунэ1утэр о умыш1эн.
Молэмрэ пщымрэ зэгуигъэуцуэхэу
Пчэгор язтыгъэр адыгагъэрэп
Тхьар зигу къэмык1эу пщым фэлъа1орэр
Зыгъэлъа1орэ адыгэ хабзэп.
Тхылъы къафеджэу къэ1ысты молэр
Къызэреджэрэ и адыгабзэп
Мыфэдиз илъэс мары тещ1агъэу
Тызэрэшы1эр тибзэп тихабзэп.