Kyara Блогер - Kyara

Фызогъэц1ыху: ЖАМБЭЧ Рабия
Четверг, 20 июня 2013 г.
Рубрика: Блоги
Просмотров: 5108
Подписаться на комментарии по RSS
Метки: Жамбэч Рабия, тхак1уэ, усэ, шыхулъагъуэ

         Жамбэч Рабия Хьэсен и пхъум (1983, Алътуд къуажэ, Прохладнэ район) КъБКъУ-м Филологиемк1э факультетым адыгэбзэмрэ литературэмк1э къудамэр къиухащ. Уси прози етх, ахэр республикэм къыщыдэк1 газетхэмрэ журналхэмрэ щ1эх-щ1эхыурэ къытохуэ.

         Рабия и тхыгъэхэр «Шыхулъагъуэ» литературэ хасэм хэтхэм я 1эдакъэщ1эк1хэр щызэхуэхьэсауэ къыдэк1а тхылъхэм («Къудамэщ1э» 2009гъ., «Шыхулъагъуэм и вагъуэхэр» 2010гъ.) ихуащ.

 

 

*   *   *

                            Къысхуэбгъэ1эсэми уи бзэр,

                            Зытебгъэлъадэми фибл,

                            Пхуэхьэхужынукъым си псэр,

                            Епт1ыхыпами къатибл.

 

*     *     *

                            Тумыгъэхьэ сабэ лъагъуныгъэм,

                            Бжьыщ1к1и п1уэтк1и пхуимыгъэк1ыжын.

                            Къыпхуихьынк1э хъунущ зы мыгъуагъэ –

                            Пф1ыхэпк1энщи, укъигъэсыжынщ.

 

*     *     *

                            Къыстеплъызэу и нэр мазэм

                            Иф1эф1ыпсщ къызбгъурысын.

                            Бжэр къегъанэ дамэдазэу,

                            Къысф1игъэщ1у укъэсын.

 

*     *     *

                            Къысф1ыщ1ок1ыр нэпсыр си нэм,

                            Уафэм сэ зыкъыспещ1ыж.

                            Си гупсысэр хъуащ гъыринэ,

                            Уэшхым сэрэ зы дохъуж.

 

*     *     *

                            Згъеижа си лъагъуныгъэм

                            Дауэдапщэ изощ1эк1.

                            Зи нэр къыстеплъыза дыгъэм

                            Щхьэк1уэ 1эпл1э къызешэк1.

 

*     *     *

                            Псынэпск1э къитхьэщ1ык1а уи гум

                            Мывэджеижьхэр щызонт1э1у.

                            Гукъеуэм ихуза уи нэгум

                            Кърехыр псэр зыкъуз бэ1ут1э1у.

 

*     *     *

                            Жа1эр си ц1эр гъатхэм ирагъэщхьу,

                            Пц1ащхъуэм и бзэр сытк1э спэгъунэгъу?

                            Тхьэм къыщ1имыгъэк1к1э ахэр 1уэщхъуу,

                            Си ф1эщ хъуар нэм хуэхъужыну бжэгъу.

 

 

 

*     *     *

                            Нэм и плъап1эу

                            Псэм и гуапэ,

                            Гум и джак1уэу

                            Сыногуак1уэ.

*   *   *

                            Узмылъагъуми, ущыслъагъук1и

                            Ф1ыщэу узолъагъу.

                            Сыплъагъу мыхъуу, сумылъагъуми,

                            Зызумыгъэлъагъу.

 

*   *   *

                            Си гум телъ пшагъуэр

                            Дапщэщ тебгъэк1ыну?

                            Уэрщ ар зи 1эзэгъуэр,

                            Сибгъэл1ык1ыну?

 

*   *   *

                            Нэхэр зэпэ1эщ1эм,

                            Гухэр зэрыщ1энкъым.

                            Гухэр зэрымыщ1эм,

                            Псэхэм зы защ1ынкъым.

 

*   *   *

                            Сыноджэр макъыншэу,

                            Сынотхэр псалъэншэу,

                            Сыноплъыр нэр плъызу,

                            Сыбблок1ыр гур узу.

 

*   *   *

                            Узогъэщхьыр дыгъэм –

                            Уи гур хэтк1и хуабэщ.

                            Узогъэщхьыр пшагъуэм –

                            Си деж ар щына1уэщ.

 

*   *   *

                            Си гур ныхуозэшыр

                            Уи псэу къыстезашэм,

                            Гъащ1эр сф1ызэблешыр

                            Ди гъуэгу нашэкъашэм.

*   *   *

                            Си гущ1эм лъапц1эу уэ уитащ,

                            Щыкъуейуэ абджи щыпкъутащ.

                            У1эгъэр дэ зэдэдгуэшащ,

                            Е бзаджэм зы гъуэгу тхухишащ.

*   *   *

                            Сыхуейкъым услъагъуну ущхьэжагъуэу,

                            Сыхуейкъым сыщ1эплъэну нит1 нэщхъей,

                            Сыхуейкъым ущыблэну уафэм вагъуэу,

                            Угуф1эу усщ1ыгъунырщ сызыхуейр.

 

*   *   *

                            Уозэшыр, сощ1э, уозэшыр,

                            Къэбгъэщ1ыр зэз дыджым пыбощ1.

                            Сосэжыр, гугъуми, сосэжыр,

                            Уэрыншэу гупсысэр сошэщ1.

 

*   *   *

                            Уафэм вагъуэ къесхьэхауэ

                            Зэгуэр сепщ1ыхьащ.

                            Сыщ1эпсэум сыкъытепхауэ

                            Къысхупэк1уэжащ.

 

*   *   *

                            Топышэу псалъэр уи бзэгу тесщ,

                            Сызэда1уэр нит1ырщ.

                            Гупсысэ нэхук1э ахэр щызщ,

                            Дэгу сощ1 тхьэк1умит1ыр.

 

*   *   *

                            Лъагъуныгъэм щимэ 1уэхур

                            Къыхыхьамэ, удын къуедз.

                            Насып нахуи, гухэлъ щэхуи

                            Щысхь имыщ1эу зэбгредз.

 

*   *   *

                            Ухьэфизкъым, унабгъэкъым,

                            Удэгукъым, умыжьажьэ.

                            Убзагуэ-убзэныкъуэкъым,

                            Ат1э щхьэ ущхьэлажьэ?

 

 

 

*     *     *

                            Гъы, бжэ, лъа1уэ, тхьэджэ,

                            Гум уихужащи, узмыщ1эж.

                            Ухуеймэ дапщэри къызэджэ,

                            Уи ц1э къудей къысхуэмыщ1эж.

 

*     *     *

                            Си гур гъатхэхуещэщ,

                            Си псэр гъатхэхуэлъэщ,

                            Си лъэр гъатхэпежьэщ,

                            Си нэр гъатхэхуэплъэщ.

 

*     *     *

                            Дыгъэм си 1эпэр и1ыгъыу,

                            Мазэм Шыхулъагъуэр дэщ1ыгъуу,

                            Укъэдгъуэтын ди гуращэу

                            Дыплъыхъу зэпытми, гъащ1эу

                            Къыздэдгъэщ1ами уемыплъу,

                            Ди лъагъуныгъэр бгъэбгъунлъэу

                            Ущыхэт дыдэр тхутэнкъэ,

                            Пхуэмыгъуэт псори п1уэтэнкъэ!

 

 

 

*     *     *

                            Мазэ ныкъуэ, гу уныкъуа,

                            Псэ ныкъуэдыкъуэ,

                            1эпкълъэпкъ уэдыкъуа.

                            Дыгъэ жьэражьэ, гупсысэ губжьа,

                            Щ1эщэща яжьэ, щ1ыр зыгъэжьа.

                            Щымы1эж гугъэ, уафэр зыгъэгъа,

                            Лъагъумыхъуныгъэ,

                            Гъэгъар зыгъэгъуа.

                            Ц1ыхуншэ гупк1э, пц1ы хэдык1а,

                            Гухэлъ пк1эрапк1э,

                            Пэж зэпышхык1а.

                            Гурыщ1э махэ, ц1ыху дэхуэха,

                            Дунейгъэдахэ,

                            К1ыф1ым хэбзэха.

                            Къел1ыха нап1э, нэпс зыщ1эуа,

                            Щымы1эж плъап1э,

                            Гу зэщыуа…

 

*   *   *

Укъысхуэныкъуэщ, укъысхуозэш.

                            Хъарзынэ дыдэщ! Уигу зэщыуа?

                            Къэлъа1уэ ф1ыуэ, умыщ1эу еш,

                            Пшыныж си псалъэу узэгуэуар.

 

                            Си лъагъуныгъэм и дэп жьэражьэр

                            Къызжьэхыупхъэжу ущежьэжар

                            Сигу къредзэжри, щ1эщэща яжьэрщ

                            Узыхуэзгъадэр, узгъеижащ.

 

*   *   *

Дыщызэщ1ыгъуи, ущыспэ1эщ1и,

Укъыск1элъыжэу укъыщызэджи,

Псалъэ 1эф1 ц1ык1ук1э уи гур ф1ы щысщ1и,

Ущызгъэбамп1и, ущызгъэтхьэджи,

Ныкъуэзэгуэчу укъыщызгъани,

Ук1ытэр к1уэду ущыгъынани,

Сызэпшэл1апэу укъыщызэплъи,

Си щ1ыб пхуэзгъазэу сыныщомыплъи,

Уи макъи уи щхьи щызгъэхьэрэми,

Дыдж зэзу псалъэр щыптезгъэлъалъи,

Услъагъуххэну сыщыхуэмеи,

Уэ къыббгъэдэк1ыу зы тхыгъэ к1апи,

Уэ къыппкърык1ыу зы псалъэ налъи

Сыщ1эмыхъуэпсу защыщыздзеи

Езэш умыщ1эу, уз зэхыумыщ1эу,

Уи псэр мыжэщ1у, гугъэр мык1уэщ1у

Уи гур щхьэхуитщ, уощ1 нэрылъагъу,

Жып1эр псалъит1щ: «Ф1ыуэ узолъагъу!»

 

 

 

*     *     *

                            Зэ закъуэ зызгъэлъагъуж,

                            Зэ закъуэ къысхукъуэплъыж,

                            Зэ закъуэ нит1ыр гъэгъыж,

                            Зэ закъуэ гур къэгъэплъыж,

                            Зэ закъуэ гугъэ къетыж,

                            Игъащ1эк1э псэр гъэтыншыж.

 

*     *     *

                            Сыту п1эрэ къыщ1емысыр уэс

                            Дуней псор хужьыгъэк1э ихуапэу?

                            Сыту п1эрэ къыщ1емысыр уэс

                            Щ1ыми ц1ыхуми – псоми яхуэгуапэу?

                            Сыту п1эрэ къыщ1емысыр уэс

                            Вындхэр я лъэуейхэм кърихухыу?

                            Сыту п1эрэ къыщ1емысыр уэс

                            1эжьэ ц1ык1ухэр къызэкъуаригъэхыу?

                            Сыту п1эрэ къыщ1емысыр уэс

                            Ц1ык1ухэр игъэгуф1эу, игъэпэплъу?

                            Сыту п1эрэ къыщ1емысыр уэс

                            Апхуэдизу псори дызыпэплъэр?

                            Сыту п1эрэ къыщ1емысыр уэс

                            Илъэсыщ1эм и дамыгъэ къабзэр?

                            Сыту п1эрэ къыщ1емысыр уэс

                            Псоми ди зэхуэдэу ди нэр, ди псэр?

                            Сыту п1эрэ къыщ1емысыр уэс?

 

*     *     *

                            Пхуэсщ1ыфыну тыхь си гъащ1эр

                            Зэгуэр щытыгъащ.

                            Гъатхэ куэдк1э гухэлъ гуащ1эр

                            Си гум щыгъэгъащ.

                            Бжьыхьэ мащ1и избгъэха уэ

                            Пщ1ащэм нэпс тещащэу,

                            Гурылъ гуэри къысхуэпщ1ауэ

                            Зыкъызумыгъащ1эу?

                            Иджы, сощ1э, гъэмахуэкуми

                            Уи гум уэс къыщос.

                            Сурипщ1ыхьми, суринэкуми,

                            Гугъэр гъащ1эм щос.

                            Гум хэсчыжри лъагъуныгъэр,

                            Псэр тезгъэужащ.

                            Къуэсшэжак1эщ 1эк1э дыгъэр –

                            Усщыгъупщэжащ.

                            К1ыф1 зэпытым гу хэгъуащэр

                            Нэхум хэгъэплъэж.

                            Зыщыхыжи щ1ак1уэ гъущэр

                            Уэшхым пэгъэплъэж.

                  

*   *   *

                            Уи макъыр жыжьэми,

                            Уи псалъэр жагъуэми,

                            Укъызэмыжьэми,

                            Укъысхуэмыгъуэми,

                            Си псэр пытыху,

                            Си лъэр щ1эк1ыху,

                            Гъащ1эр сухыху,

                            Сымыщ1эу псэху,

                            Махуэл дэзмыхыу,

                            Си гум уизмыхыу,

                            Пщ1ыхь ухэзмыхыу,

                            Зы зэхэзмыхыу,

                            Сыпхуэусэнщ,

                            Сыпхуэпэжынщ,

                            Сыпхуэупсэнщ,

                            Сыпхуэпсэунщ.

 

*   *   *

                            Ежьужьу бэгъуарэ

                            Къэб къуэпсу задзауэ,

                            Гухэлъхэр убгъуарэ

                            Гупсысэр шэщ1ауэ

                            Къыппоплъэ гугъэф1хэр,

                            Ныпхуок1уэ гурылъхэр,

                            Къапежьи къэпхъуатэ,

                            Ехьэжьи гъэбатэ.

 

*   *   *

                            Къэпт1этащи и щхьэр чысэ

                            Гугъэм зыщиудыгъуам,

                            Сф1ыхэбдзащи псэр гупсысэм,

                            Хуеплъэк1ыжыт къэбдыгъуам.

 

                            Хуеплъэк1ыжи хуэжы1эщ1э

                            Зеиншафэ зытеуам.

                            К1элъыщ1эпхъуи едэхащ1э

                            Ибэу дунейм къытебнам.

 

                            Гумащ1агъэ к1элъызехьи,

                            Гугъэр гъащ1эм къыхэшэж.

                            Дыгъэр щ1ылъэм къыхуехьэхи,

                            Сытхъуу щтахэр къэгъэвыж.

 

                            Къэгъэвыжи, псэщ1э хэлъхьэ,

                            Мазэ къуапэр егъэубыд.

                            Псит1ым я кум гугъэр дэлъхьэ,

                            Арыншамэ, лъэр щ1еуд.

 

*   *   *

                            Ф1ыщэу узолъагъур,

                            Сигу хьэщыкъыр магъыр,

                            Магъыр щ1ыр дэгызу,

                            1эпкълъэпкъ псор дэузу.

 

                            Ф1ыщэу узолъагъур,

                            Сигу хьэщыкъыр магъыр,

                            Магъыр псэр ихузу,

                            Дуней псор дэгызу.

 

                            Ф1ыщэу узолъагъур,

                            Сигу хьэщыкъыр магъыр,

                            Уафэми зэхехыр,

                            Пшэжьхэри къогъыхыр.

 

                            Ф1ыщэу узолъагъур,

                            Сигу хьэщыкъыр магъыр,

                            Бзухэр мэбзэрабзэ –

                            Я уэрэдыр гъыбзэщ.

 

*   *   *

                            Бжьыхьэ пщ1ащэ дыщафэу

                            Си гъащ1эм ухуохъур дыщэпс.

                            Жэщ вагъуэ нуру лыдыжу

                            Си псэ пыщ1ам уридыгъэпсщ.

 

                            Сэрк1э умазэщ, удыгъэщ,

                            Щолыдыр уи нит1ыр си нэгу.

                            Узидамэщ, узинабдзэщ,

                            Сыбо1этри сохьэр уэгу.

 

                            Дыкъыщоблэ уэгум вагъуэу,

                            Дыщыхыхьи къохъу пшэ тхъуам.

                            Дыкъытопсэ щ1ылъэм дыгъэу,

                            Дахуэупсэу псэ п1ыщ1ам.

 

*   *   *

                            Унэф, удэгу, хьэмэрэ убзагуэ?

                            Зыгуэр уэ къыпщыщ1а?

                            Зы лажьи уи1экъым, зэт, догуэт,

                            Ар дауэ къызэпщ1а?

 

                            Уепц1ыжу псалъэу къызжеп1ахэм

                            Уи щ1ыб щхьэ къэбгъэза?

                            Уф1эщ1рэ куэдрэ сол1эл1эну? –

                            Узахуэщ, уигу зэгъа?

 

                            Гухэлъ пхузи1эр щхьэрыуакъым,

                            Сымыбжэ, сымыгъа,

                            Ат1э согугъэ, сыужьыхкъым.

                            Сыхуэдэщ удз гъэгъам.

 

                            Къысхуэщ1э сэ пхузи1э лъэ1ур –

                            Къеплъэк1и къэгъэзэж,

                            Плъэк1ынум си гум щыпсэу уи гур

                            Къэщтэжи гъэтыншыж.

 

*   *   *

                            Си гъащ1эм урипщ1ыхьэп1эу

                            Сохъумэ гухэлъ ныпхуэсщ1ар.

                            Сыножьэу, гум уриплъап1эу

                            Згъэк1уащ нэхъ дахэгъуэу згъэщ1ар.

 

                            Иджыри сыппоплъэ сыгугъэу,

                            Гъэпц1агъэу зы мащ1и хэмылъ.

                            Пщэдджыжьк1э къыщ1эк1ыр ди дыгъэу

                            Къысф1эщ1ми, къысхуещ1ыр нэмыплъ.

 

                            Хэслъагъуэу уи теплъэр пшэ къащхъуэм,

                            Мычэму сахудоплъей,

                            Сащ1эплъэмэ уи нит1у нащхъуэм,

                            Гупсысэхэм щ1онэ лыгъей.

 

                            Уезгъэщхьми уэгум ит бгъащхъуэм,

                            Щхьэхуитщ ар, имыщ1эу п1ейтей,

                            Зезгъэщхьми уэгу пщащэ пц1ащхъуэм,

                            Схуэхьэхукъым уигу щ1ы1эр, нэщхъейр.

 

                            Сыноджэми, къи1уэр тхьэк1умэм

                            Бгыхэм къи1ук1 джэрпэджэжщ,

                            Егъуэтыр жэуапу си упщ1эм:

                            «Блэк1ар къыпхуэнащ, ар гъэф1эж».

 

*   *   *

                            Уи нит1ым бжэгъуу сащ1эуэри,

                            Хьэфиз ухъуащ.

                            У1эпэрызешэщ,

                            Ауэ уафэмк1э удэплъей зэпытщ.

                            Укъысхуэзэшрэ?

                            Укъоск1эри!

                            Унэфми, бзэ уи1эщ –

                            Къызэджэ.

                            Сыкъыпхуехынщ мелы1ычу,

                            Къызэджэ закъуэ.

                            Сыкъэбгъуэтынщ мычэму,

                            Къызэджэ ущизакъуэм,

                            Къызэджэ щэхуу, хуэму,

                            Къызэджэ, къысхуэныкъуэ…

 

*   *   *

                            Гупсысэ к1апэ щхьэм къиджэрэзауэ

                            Зэблеш акъылыр, зэпетхъ псэр.

                            Дуней архъуанэм гур хэджэрэзауэ

                            Гъуэжькуийм зэрехьэ гурылъ псор.

 

                            Тенджыз толъкъуну псэр къэукъубеящи,

                            Гум илъ гукъеуэр къокъуэлъык1,

                            Дунейкъутэж къызищ1эк1ащи,

                            Гупсысэр псыдзэм щ1от1ысык1.

 

                            Гынымэ дыджк1э 1ур гъэнщ1ащи,

                            Тэмакъыр абы пхресык1.

                            Дуней гызыжыр, бдзапц1эр си щ1ыб илъщи,

                            Си нэк1ур гъащ1эм щ1ехулык1.

 

                            Псэр щхьэхуимыту зыубыд псоми

                            Къагъэщ1 гупсысэр – ар ц1ыхуук1щ.

 

*   *   *

                            Уок1уэдык1ыр лъагъуныгъэм,

                            Щэхуу гук1э зэрыпхъам.

                            Зыхуоший уэгурыт дыгъэм,

                            Нэк1э бзыпхъэ зытепхам.

 

                            Нэкъыф1эщ1у къэбгъэщ1ахэр

                            Тхыпхъэщ1ыпхъэ зэфэзэщщ.

                            Гугъэ нэпц1у зэтепшахэр

                            Щызэтепшк1э зэпощэщ.

                           

                            К1эрыщэщу, зэгуэщэщу

                            1эшк1э мыхъумэ, упык1ащ.

                            Уи 1эмыщ1эм, гур хигъэщ1у,

                            Къимыхьамэ, уиук1ащ.

 

                            1эщэ бзаджэщ лъагъуныгъэр –

                            К1акхъур щ1ачми, псэр мыжэщ1.

                            Зыхуэпщ1ам лъэгущ1ыхь уи тыгъэр

                            Лъэмы1эсмэ, гур мэк1уэщ1.

 

*   *   *

                            Уи бжэщхьэ1ум си псэр егъэбакъуэ,

                            Щ1эши уи лэгъунэм, зегъэплъыхь.

                            Къигъэзэжмэ, къызжи1эну псалъэ закъуэ

                            Тыгъэу къети сакъыу къысхуегъэхь.

 

                            И бжэкъуагъым си гум къуэзгъэпщк1уэнщи,

                            Зы къытемыгупл1эу щызгъэф1энщ.

                            Маф1и, к1ыф1и, псы къиуаи, жьапщи –

                            Псори 1уигъэк1уэту сихъумэнщ.

 

                            Къэут1ыпщ закъуэ, ущымысхьу псалъэм,

                            Уи пагагъэр къысхуумыщ1 сэтей.

                            Къыумыгъанэ си псэр лъа1уэу, далъэу,

                            Гужьеигъуэм си гур доп1ейтей.

 

                            Хыумыгъахуэ псэ бэмп1ар псы шыугъэм,

                            Гум хущхъуэгъуэу и1эр фошыгъупсщ.

                            Пумыгъэк1 си л1ык1уэр и1эж гугъэм,

                            Дыгъэм ещхьу си псэр къысхуегъэпс.

 

                            Уи бжэщхьэ1ум си псэр егъэбакъуэ,

                            Щ1эши уи лэгъунэм зегъэплъыхь.

                            Гур иризгъэф1ыну псалъэ закъуэ

                            Сынолъэ1у къептыну, ущымысхь.

 

*   *   *

                            Псалъэ налъэ къызэут1ыпщ –

                            Дыджми, щ1элъми 1эф1агъ т1эк1у.

                            Си псэр бамп1эм къегъэут1ыпщ,

                            Зэхыумыщ1эу си гур мэтк1у.

 

                            Нэгум нурыр щоужьых,

                            Пшагъуэ 1увыр мэхъу сэтей.

                            Дыгъэр уэгум, мес, йожыхь,

                            Гум пытк1у нэпсым щ1ыр есей.

 

                            Псыдзэ шыугъэм сыхэхуами,

                            И 1эр зыми къимыший,

                            Тафэ нэщ1 сыкъихутами,

                            Хозэрыхьыр лъэр лъэнтхъуийм.

 

                            Сщ1ынут вагъуэк1э уи теплъэр –

                            Жэщым мазэм зысщедзей.

                            Дагъэнащ зэвып1эм си лъэр,

                            Дуней псор къыздонэщхъей.

 

*   *   *

                            Щхьэщэ къытхуищ1 щ1ык1эу дыгъэр къытхуоплъых,

                            Мазэм пк1атэлъатэу уэгур зэпеплъыхь.

                            Вагъуэхэм зэу1уу ди сурэтыр ящ1,

                            Псэр дэушэу бзухэм макъамэр яшэщ1.

 

                            Къуанщ1э ц1ык1у нэгъунэ ди ц1эр къа1ущэщ,

                            Хьэпщхупщи, гъудэ-бадзи я гур зэрощэщ.

                            Я щхьэр удз щхъуант1эпсхэм пагэу къа1этащ,

                            Дуней псор уэрэдым, гуф1эм зэщ1ищтащ.

 

                            Гъащ1ит1 зэпыщ1эным къуршыбгъэр йол1ал1э,

                            Ди псэхэм я чысэр пц1ащхъуэхэм я1ул1э.

                            Бжэндэхъу бын дэлэлхэм ди насып зэ1уащэ,

                            Пшэхэр зэ1уок1уэтри, ф1ыгъуэр къыттощащэ.

*   *   *

                            Зызошал1э псалъит1,

                            Зызошал1э ц1ыхуит1,

                            Зызошал1э гъащ1ит1 –

                            Къысхущ1едзыр гуит1щхьит1.

                            Зумышал1и псалъит1,

                            Зумышал1и ц1ыхуит1,

                            Зэпшэл1энкъым гъащ1ит1,

                            Ухэтынкъым гуит1щхьит1.

                            Зэпызочыр псалъит1,

                            Зырыз сощ1ыр гъащ1ит1 –

                            Къысхущ1едзыр гуит1щхьит1.

                            Пф1эф1мэ гъащ1э щхьэхуит,

                            Удэмыхьэ ц1ыхуит1

                            Я зэхуаку, я псалъит1.

 

*   *   *

                            Уи теплъэр, плъэк1эр къысхуэщ1эжкъым,

                            Ар дауэ? Си акъыл тек1а?

                            Арауи сщ1эркъым. Згуры1уэжкъым…

                            Къэхъуар сыт? Си щхьэр зэк1уэк1а?

                            Сыхэту п1эрэ пщ1ыхь шынагъуэм?

                            Мыгуры1уэгъуэм щхьэр доуз.

                            Хьэуэ, и к1апэм гуныкъуэгъуэм

                            Сытеувауэ арщ, – согыз.

                            Къок1эзызык1ыр гур къипк1ыну,

                            Напщ1эр гукъеуэм хухолъэт.

                            Зыпщагъэнщ1ыхук1э къоплъыжыну

                            Хуейми, си нит1ым уапок1уэт.

                            Къык1эрочыжри си псэм уи псэр,

                            Нэпс шыугъэр пытк1уу 1убохыж.

                            Къыздагъэщ1ар а т1ум пщ1ыхь шыпсэм

                            Хуэбгъадэу зыр зым хогъэк1ыж.

                            Иджы гукъеуэ ныкъуэгъущым

                            Уи теплъэр, плъэк1эр хогъуэщыхь.

                            Хъужыпэу щытмэ, нэплъэжыгъуэ

                            Згъуэтынщи, ди блэк1ар хъунщ пщ1ыхь.

 

Сурэт

                            Нэпсым илъэса сурэт

                            Си пащхьэм илъщ.

                            Соплъ, къызоплъыж,

                            Блэк1ам ар и щыхьэтщ.

                            Си нэгу щ1ок1ыж

                            Къыздэдгъэщ1ар, къызэпытчар,

                            Зэман здэтхьар пызобжык1ыж.

                            Гур зыуныкъуа, псэр зычэтхъа

                            Гукъеуэр сигу къок1ыж:

                            Гурыщ1э мыт1эп1ар,

                            Щхьэгъэпц1эж гугъэр,

                            Псэм пыжэбзык1а

                            Нэпс шыугъэр,

                            Зэпачу зэпамыдэжа ди лъагъуэр,

                            Фыгъуэнэм къытхуихьа мыгъуагъэр.

                            Пц1ым зэпишхык1а ди лъагъуныгъэр…

                            Псэр жэщ1у соплъыр уи сурэт.

                            Зэпызоплъыхь. Аргуэру нэпс…

                            Щ1эрыщ1эу къэгъэгъа мыгъуагъэ,

                            У1эгъэ зылъыса гукъуэпс.

                            Щ1э зыщ1эмыт си гуныкъуэгъуэ,

                            Тек1уэт си гъуэгу.

                            Къызэт псэхугъуэ.

                            Сумыгъэхыщ1э,

                            Иплъхьауэ си псэр уи 1эмыщ1э,

                            Ущ1этщ си нэгу,

                            Гуф1эгъуэм, ф1ыгъуэм

                            Сыщыбгъащ1эу,

                            Согъэжы1эщ1э.

                            Тек1уэт си гъуэгу,

                            Къызэт псэхуэгъуэ,

                            Гурыф1ыгъуэ,

                            Си гуныкъуэгъуэ,

                            Си мыгъуагъэ…

 

Егъэджак1уэ

                            Щ1эныгъэм нуру хэтэджык1ыу

                            1эщ1агъэу гугъэ псэм хуэхъуж.

                            Усуэхъуэжынкъым узгъэик1эу,

                            У1эгъэу згъуэтыр зыдэхъуж.

                            Уэ уи ц1эр ф1ык1э бэм къа1этыр.

                            Щытхъупсыр гуащ1эк1э къохьыж.

                            Езым пщ1ыжауэ уи сурэтыр,

                            Уи напэр, фащэр къозэуж.

                            Егъэджэныгъэм пыщ1а псори

                            Гу къуэпсхэм мывэу хэжыхьам,

                            Уи к1эн къик1ащи, жьыри щ1эри

                            Зыщ1эхъуэпс гъуэгум утехьам,

                            Къик1уэт умыщ1эу к1уэ, ебакъуэ –

                            Лъэпощхьэпохэр къызэнэк1.

                            Ухуимык1уэт зы гугъуехь закъуэ,

                            Нэхугъэм гъащ1эр хуегъэзэк1.

 

*   *   *

                            Укъызоупщ1ыр уэ мычэму:

                            «Си нэхум уи гум сыкъэк1а?»

                            Сф1эщ1ыжу сэри ар тэмэму,

                            Бжызо1эр: «Тхьэ укъэмык1а».

 

                            Угъын хьэзыру укъызоплъыр,

                            Уи плъэк1эр сщохъур дыхьэшхэн,

                            Узгъэунэхуу сыпк1элъоплъыр,

                            А псор уэ сытк1э бгуры1уэн.

 

                            Уи нит1ым, сощ1э, лъагъуныгъэр

                            Ящ1эзщи, нэпсыр къамыут1ыпщ,

                            Умыгузавэ, уэрщ си дыгъэр,

                            Уэращ си гъащ1эр, къысхуэпщ1ыпщ1.

 

                            Умыщхьэх закъуэу уэ къызже1э:

                            «Си нэхум уи гум сыкъэк1а?»

                            Къэсынщ зэмани, сигу ныпхуе1эм

                            Къуитынщ жэуапыр: «Укъэк1ат!»

 

*   *   *

                            Уэзгъэщ1эну схулъэмык1ыу.

                            Уэри сызэхыумыщ1ык1ыу,

                            Успэ1эщ1эм гур къигъык1ыу,

                            Услъэгъуамэ, псэр къыщыпк1ыу,

                            Сыщ1охъуэпс сыщыпсэуну

                            Уи гум, сыщыпхуэусэну,

                            Уи псэ куэщ1ым сибгъэсыну,

                            Зызгъэнщ1ыху согупсысыну…

 

*   *   *

                            Къит1ысхьэ си гъащ1э хъыринэм,

                            Дещ1энкъэ мо мазэм нэсыху.

                            Дыщ1эплъэу дыгъэми и нэм,

                            Зыдгъаф1эу дисынщ дрикъуху.

 

                            Уи вагъуэм си вагъуэр хуэтшэнщи,

                            Я псит1ыр зы чысэм итлъхьэнщ.

                            Чысащхьэри быдэу тпхэжынщи,

                            Лыдыжу лэрыпси итщ1энщ.

 

                            Уи гъащ1эм сысейр къыпытыжу

                            Хъыринэм и куэщ1ым щытхьынщ.

                            Ди вагъуэр уафэгум итыжу

                            Дунейм дахагъ куэд къыпытхынщ.

 

*   *   *

                            Успэжыжьэщ, ауэ узолъагъу,

                            Зэхызощ1эр уи гур къызэрыск1эр.

                            Дуней псор абы зэрыщ1иупск1эр

                            Къэщ1эгъуейкъым сэрк1э. Лъагъунлъагъу

                            Ныпхуэк1уэну хуейщи, псэр мэлъа1уэ,

                            Зыс1эщ1ечыр, зы зэхимыхыж.

                            Сф1ызэпечыр гугъэр, зи, мыда1уэ,

                            Пагэныгъи напи емыплъыж.

                            Шэ ц1ывауэ си пкъым зызэпхедз,

                            Сыкъеуфэрэзыхь, сигъэхэшэну,

                            Сегъэда1уэ, маф1эу зыкъызедз.

                            Щ1ызегъэхьэ си щхьэр псэ инатым,

                            Къысхуоув лъэгуажьэмыщхьэу, магъ:

                            «Сыблумыш си гъуэгум, уэ уи нат1эм

                            Къритхар, солъэ1ур, зэгъэлъагъу»,

                            Къызе1уэк1ыр узыхуэдэр си псэм,

                            Пщ1ыхьым укъыхешэр, ухешыж.

                            И курыхыр къыщыплъыс гупсысэм

                            Къысщхьэщыхьи сыкъэгъэушыж.

 

*     *     *

                            Къэпт1ыжащи уи 1эк1э уи мащэр,

                            Сытхэр сэ 1эмалу пхузи1эж?

                            Псэгъу зыхуэпщ1ыжащи нэгъуэщ1 пщащэ,

                            Насыпыншэ гъащ1эм къыщ1одзэж.

                            Уриджэгуу къепхуэк1а насыпыр

                            Къэбдзри си щхьэр зэгуебгъэудащ.

                            Тхьэмыщк1агъэм къыхэлъэлъа дэпыр

                            Маф1э хъуаск1эу си гум тебудащ.

                            Зэмык1у пф1эщ1ри, псит1ыр зэрылъ чысэм

                            И лэрыпсыр жагъуэу зэпыпчащ.

                            Щ1эптыфын пф1эщ1ами ууейр си псэм,

                            Уи щхьэр къэбгъэпц1эжу къыщ1эк1ащ.

                            Жагъуэгъу бзаджэм ирамыпэс 1уэхур

                            Уи гупсысэм тхъугъэу хэбдзэжащ.

                            К1ыф1 зэпытым къыпхухэща нэхур –

                            Дыгъэм щыщ бзыхьэхуэр, хуэбдзыжащ.

                            Уф1экуэду къыпхуэнэжа гъащ1эр,

                            Къыпщохъу ущылейуэ мы дунейм.

                            Ущыхьэулейуэ щ1ыгу щ1эращ1эм,

                            Пхуэмыфащэу уахэтын ц1ыху хейм.

                            Мазэм къи1ущэщхэм уахуэдэгуу

                            Щыщыта зэманыр уигу къок1ыж.

                            Узыхуэк1уэр уэ уи занщ1э гъуэгуу

                            Мащэм ек1уу сыныр уогъэжыж.

 

*     *     *

 

                                      Насып лъэмыжыр 1ущ1ауэ,

                                      Гугъэм и псынэр жэщ1ауэ,

                                      Зэш зэфэзэщк1э кудауэ,

                                      Псэм и 1унк1ыбзэр к1уэдауэ,

                                      Гум хуэк1уэ лъагъуэр гъуэщауэ,

                                      Гупсысэ дыджыр губжьауэ,

                                      Укъытенами уэ щауэр

                                      Мы дунеижьым зы жьауэ

                                      Щумыгъуэтыжми, сф1эф1ыпсщ,

                                      Пхуэхъумэфакъым псынэпс

                                      Ф1эк1 умыщ1эн лъагъуныгъэр –

                                      Дуней жэнэтым щепс дыгъэр.

 

 

Комментариев: 3
2013-06-22 в 13:05:15 | Марьяна Жинова

Kyara, спасибо, пока прочла лишь половину, но спасибо за знакомство)

2013-06-22 в 15:00:31 | Kyara

Марьяна, пожалуйста! Она прекрасно пишет!

2013-07-07 в 14:07:58 | асна

Немного трудновато с языком, но прочла. Очень глубокие мысли содержат стихи Рабии. Умница!

Спасибо.

Архивы
«« Март 2024 »»
ПнВтСрЧтПтСбВс
    123
45678910
11121314151617
18192021222324
25262728
29
3031
Вход для зарегистрированных пользователей
Забыли пароль?
вход
Регистрация