ШыщхьэIум и 14-м и пщэдджыжьыр икъукIэ гущIэгъуншэт. «Машук» щIалэгъуалэ зэхуэсым сыкIуэныр си мураду, нэжэгужэу сыкъызэщыуат. Компьютерыр щIэзгъанэри сызэджар пцIыуэ къысщыхъуащ. А дакъикъэм зэхэсщIам и гугъу сщIыну сыхуейкъым. Псалъэншэуи сыкъывгурыIуэну къысщохъу. Зыгуэр стхыну сыхуеят мыбы теухуауэ, ауэ дыздэкIуам интернет тэмэм зэрыщымыIам, зэман зэрыдимыIам къыхэкIкIэ сыхуэхъуакъым. Нобэщ Къэбэрдейм дыкъыщыкIуэжар.

Альберт теухуауэ жысIэну сызыхуейр зыщ: ди лъэпкъым къыхуищIар зыкIи къыпхуэпщытэнукъым. Нэгъэсауэ адыгэлIу щытащ. Абы къырихьэжьа Iуэху дахэхэр Тхьэм нэзыгъэсыжыфын лъэпкъ узыншэ дищI. ЩIалэхэм захуэзгъазэу жысIэну сыхуейт: гъуэгум фысакъ.

Мы усэр Къэжэр Альберт фэеплъ хузощI. Тхьэм уи хьэдрыхэр дахэ ищI.

Пщэдджыжь нэмэзым уэсэпсыр

Щыгъэ зэрызу къигъэщIырт.

Уафэ ныкъуэплъым и нэпсыр

Си гум ещхьу сфIыхэщIырт.

Хъыбар гуауэр псэм сфIыхэуэрт

Мастапэр игъэджэгуу.

Пшэ къегъыххэм сыпэщIэуэрт

ГъащIэм и бзэм сыхуэдэгуу.

Лъыр увыIэрти, игъэзэжырт,

Гум илъ гуауэр шэчыгъуейт.

Псэм и жьэгум сыхуэзэжырт,

Къэхъур икъукIэ фIэщ щIыгъуейт.

Нэпсыр сыхуейт сыутIыпщыну -

АдыгэлIым гъын и хьэлкъым.

Сыхуейт гуауэм сыхэпщыну,

Ауэ гъащIэр ятIэ гуэлкъым.

Хьэдрыхэ кIуар симыблагъэми,

ГущIэр къыритхът тырнэушкIэ.

Дуней псор гуакIуэу гъагъэми,

Гъуалэрт си псэр къыщыушкIэ.