Сурэтыр Жынэ Марьянэ ейщ

Гъэмахуэ дыгъэм щхьэхынэу и бзийхэр Налщыч къыдидзэт. Щэбэт махуэм къалэдэсхэр загъэпсэхут. Хэти апхуэдэ махуэхэр унэм щIэсу, щылъу игъэкIуэну ифIэфIщ. Хэти уэрамым къыдокIыри КъБР-м и къалащхьэм и тхьэмбыл удзыфэхэм къагъэщI хьэуамкIэ мэбауэ. ТIуми щымыщу нобэ щыIар усыгъэм дихьэх цIыхухэращ - Саральп Мадинэ и унэм Къэжэр Лянэ и усэ пшыхь щекIуэкIащ.

Контактым, фейсбукым исхэр Лянэ и творчествэм щыгъуазэщ. Ауэ дапхуэду щымытми, езы пщащэр и усэхэм къеджэу зылъэгъуа куэд щыIэтэкъым. Ныщхьэбэ Iэмал диIащ усыгъэ IэфIым и къару гъунэншэр зэхэтщIэну.

Усыгъэм и бзэр зыгъэпсалъэ пщащэр утыкум къихьэри псоми фIэхъус гуапэ ярихащ. Абы и гъусэу утыку къихьащ щIалэми зи цIэр жыжьэ Iуа пианист Къэбэрдокъуэ Мурат. А итIур зэгъусэу къыкIэлъыкIуэ сыхьэт иримыкъум зэдежьууэ гущIэм къеIэзащ. Зыр зым дэIэпыкъужурэ псэм фIэIэфI телъыджэ къагъэщIэну яхузэфIэкIащ. Лянэ усэ Iей жиIакъым, ауэ си щхьэкIэ сыкъапщтэмэ, уситI си гум нэхъ дыхьащ. Зыр пщащэм и анэшхуэм хуэгъэзат, етIуанэр 2011 гъэм дунейм ехыжа и ныбжьэгъу хъыджэбз цIыкIум. Иужьырей усэм залым щIэса псори къызэфIигъэзэрыхьат, иныкъуэхэми нэпс къаIэщIэкIащ. Ауэ ущыдыхьэшхи къыхэхуэт. Апхуэдэу къызэхуэсахэр игъэдыхьэшхащ Лянэ школым щыщIэсам литературэ урокхэм щIэсу иуса пычыгъуэхэм. 

СызэреплъымкIэ усакIуэщIэм лъапэ махуэ пщэдейм хичащ. НыбжькIэ щIалэми акъылкIэ балигъ хъуа пщащэм имытхьэкъуауэ зы цIыху залым зэрыщIэмыкIыжам шэч къытесхьэкъым. Сыхуейт Лянэ сехъуэхъуну и усыгъэ гъуэгур захуэну, и гухэлъхэр къехъулIэну.

Иужьырейуэ сыхуейт усыгъэм дихьэххэм захуэзгъэзэну. Пщэдей Саральп Мадинэ и унэм иджыри усэ пшыхь щекIуэкIынущ. ДыфIэфIу псори фыкъыдогъэблагъэ.