Мо философие куу зыхэлъ къэбарыр сыц1ык1узэ тятэшым сигъэш1эгъагъ. Къынэужыми, къалэмэ къарык1ыхэу тикъоджэгъухэр къызык1охэрэм, а къэбарыр къысагъэ1уатэщтыгъэ. Шъугу рихьмэ – сигуапэ хъун.
Непэрэ дунаим ыпэк1э зы тыгъэм къепхъэк1ыгъэу жъуагъо, мазэ, дунай заул зэра1оу, зэрэш1эжьхэу, зэк1элъык1ожьхэу, тхьамык1агьуи, сымэджэгьуи къямык1оу, губгьэн- гукъауи амыш1эу Тхьа1уфыдым[1] фэдэу зэрэгьэтхъэжьхэу ц1ыфыхэм зы шы1ак1э я1агъ. Зым зыр ыгьэлъэп1энымрэ, ыгьэш1онымрэ нэмык1ырэ 1оф ямы1эу шэн-хэбзэ дахэр гупшысэ гьунэм нагъэсыгьэу псэухэзэ, ц1ык1у-ц1ык1оу бзэджэш1э зырызхэр къахафэ хъугьэ. Нахьыбэмэ яц1ыфыгъэ кьызэрихьэу, бзэджаш1эмэ бзэджагьэк1э апэгьок1ынхэу фэягьэхэп. Мафэ кьэс ц1ыф бзэджахэр нахьыбэ хъухэу, ябзэджагьи рагьэхъоу, нэмык1ырэ ц1ыфмэ яягъэ арагьэк1эу зэхъум ГАЛАКСИМ (Галактикэ) хасэ аш1ыни, зы хэк1ып1э фагьотынэу фежьагьэх.
Ятыгьэ кьегъэт1ысэк1ыгьэ Дунай пстэури зэрэш1эх; мазэу жьуагьоу къэлъагьохэрэми ц1ыф зэрэщымыпсэушъущтыр аш1э. Бзаджэмэ бзэджагъэ арамыш1эу зы хэк1ып1э зэрэфагъотын фаер Хасэм къышыгущы1эрэмэ къа1о.
Ахэм зы Дунай шъхьафитэу аратыгъэк1и 1офыр зэш1охыгьэ зэрэмыхъуштыр аш1э, сыда зып1ок1э а лъэхъаным щы1эгъэ ц1ыфхэр ГАЛАКСИМ епхыгъэ Дунай пстэуми к1он фитыгъэхи ары. Аужыпкъэм, сыд фэдэрэ ошъогуи щыбыбынэу зы къухьэ аш1ыни, ц1ыф бзаджэхэр раугьоени, ГАЛАКСИМ ращынхи нэмык1 ч1ып1э къафагъотын, къэмык1ожьышъунхэу, къыщыранэнхэу унашъо аш1ыгь. Пхъэдз зырадзэм, аш1ыщт къухьэр зезыфэщтыр, шъхьагъырыт фэхъущтыр, гьэ1ажак1охэр, пщэрыхьыхэр адыгэхэм ахащынэу къафик1ыгь.
Бзэджаш1эхэр ащ нахъыбэ мыхъухэ рапш1эзэ, гузэжьогъук1э къухьэр аш1и, бзэджаш1эхэм яхьак1э-къуак1эхэри зэрягъусэу ГАЛАКСИМ кьик1ыгъэх. Шъуц1эгъак1эр аухи, нэмык1 Галаксим къызыхахьэхэм анахь тыгьэ лыдэу къэлъагъорэм къыдек1ок1ырэ Дунай зыфэп1он пстэури къак1ухьагъ. Зым псы тетэп, адырэм лэжьыгъэ кьыщык1ырэп, ящэнэрэм жьы тетэп, къэнэужырэм сэпэ зэхэль, ащымэ анэмык1ыр – мэш1о тхъуабз. Къэбыбыхьэмэ-къэбыбыхэзэ мо Дунаим къышъхьэрыхьагьэх. Псыри, жьыри, шхъонт1агьэри ащ щыбэрчэт. Къушъхьэхэр ошъогум ет1э маш1ок1э къыдэуаех,ныджхэми псы жъуагъэхэр ащэукъоралъэ. Къухьэм ехып1э фагьотын агу хэлъэу къэбыбхэзэ - Iошъхьэмафэ ш1уанэхи, къухьэр кьефэхыгь. Къухьэр зэхэутыгь, ащ исхэри Дунаим тетэкъухьагъэ хъугьэ. Зэхэутыгьэ кьухьэм зыземыгьэзэжьышъум, къухьэм хэлэжэгъэ адыгэ лъэпкъыри бзэджаш1эмэ кьафагьотыгъэ Дунаим кьытенэжьыгъэх. Апэрэ дэдэм ахэр зыдэщы1агъэхэр Тхьэм иджэнэтыгъ. Адыгэм коци, мыи ышхыгъэп, Тхьэм иджэнэт фиукъэбзыгъ. Къухьэзефэм зэрамыгьэзэжьышъурэр Тхьэм зыре1ом:
- Шъумыщын, лъэпкъ дахэр и Хэбзэ дахэ сыдырэ къини хищыжьышъущт,- ы1уагь.
Тхьэм Джырэп адыгэм зызигъэк1одыгьэр, пхъэдз кьызфек1ыр ары нахь.
[1] Мэлаичым – похожий на Ангела
Джэудэт Шэуджэн Измир дэс. Афион вилайет, къалэ ц1ык1оу чылэр зэпхыгъэр – Султан Дагъи, чылэр Ак-Баба